兩位教練Gordon 同Leo帶我地七個人到馬鞍山郊野公園，準備係馬大石澗玩游繩降落abseiling.玩0既四人，三人隨行影相．今次用0既裝備同我8/7/2013第一次係梧桐寨玩唔同.因為今次溪降,會係濕滑0既石頭上滑落(好似玩滑梯咁).所以pat pat 位置有塊黃色膠,用0既扣亦唔同.
教練教我地點用0的扣. 其實我病病地,不過就算唔病,都搞唔掂0的扣同繩haha. 簽同意書前,教練提醒我地可以隨時撰擇玩同唔玩, 自己整0的扣,或者教練幫你又得……
本來我以為我第一次玩已經係香港最長0既梧桐寨瀑布.今次第二次玩瀑降,應該比上次輕鬆. 但今次加插咗跳崖,好驚險刺激!爬落瀑布前,教練講解咁咁咁.我地亦會睇教練示範,但有時有0的位,教練入咗瀑布入面,係睇唔到佢.即係你自己未落去,始終唔知下面咩環境. 仲有第一次玩,全程教練都磅住我. 今次有0的時間要自己搞掂. 當教練講點點會浸死.我有個朋友拗底,冇玩足全程.
最令我印象深刻係英雄瀑跳水. 之前睇片覺得無乜野,我跳過雙鹿石澗仲高啦見人徒手爬上去,好有難度.我搞唔掂,教練Gordon整咗條繩. 有個男學員用繩爬咗上去,不過唔敢跳,用繩落返黎. 我都用繩爬咗上高處,不過仲差一步先去到教練Leo企緊個跳水位. 我雙手捉住上面舊石,左腳一跨,唔夠長同技術 .朋友係下面比半天吊0既我嚇死.雖然我驚,但我對教練Leo好有信心(上次玩瀑降比佢係瀑布一手的起我). 今次佢救我一命,又的咗我過佢0個邊.我赤腳爬, d 石有點鎅腳,腳損咗少少. Leo叫我踏住Leo佢隻腳,真係唔好意思,要照顧我呢個麻煩學員.Leo, Phoebe 同我企咗係上面一陣. 本來Leo數三聲三人一齊跳,我怕,無跳到. Leo見我無跳,佢都無跳,怕留我一個係上面. Leo教練真令我感動! 我大嗌住, 一躍而下.哈哈!都唔型0既,不過好過癮! 天然滑梯亦好好玩!
雖然我病病地玩完呢次溪降,病咗差唔多兩星期,右手肘少許撞傷. 我會繼續呢個刺激好玩0既活動. 繼續explore ,挑戰自己,信自己,信別人!
Leo’s Photo Album
Gordon 's Photo Album
Phoebe’s Photo Album Part 1 & Part 2
Video by Leo
