如果十二月頭無撞車,今晚我就飛去愛爾蘭.真的心不甘.不過人生無可能全部都係順景的.
無線 J2 播”求婚大作戰”,我係澳洲睇過,好好笑0既日劇.內容講述於婚宴時,男主角透過教堂妖精0既幫助,多次回到過去.希望可以改變現實----青梅竹馬0既女主角下嫁他人.
有時都會諗,如果以前我咁做,宜家會點呢?
時光唔可以倒流,過去只能懷緬.忘記背後,努力面前.
2010年1月5日 星期二
第一次覆診後
4/1 媽咪陪我覆診.我問醫生最快幾時可以返得工.有個心理準備.”最快都兩個月後，用多兩星期枴杖，跟住試下自己行啦.”即係最快都要三月先可以返工.之前醫生話骨4-6星期好(網上資料亦一樣).以前讀書讀過,一個人知道自己病,有時會出現：anger,denial等返應．我否認的情況較嚴重吧．我以為自己２３／１２仲可以做姊妹，一月中可以去行山，可以繼續愛爾蘭之旅．．．不過宜家得面對現實(三個月完全康復)．
我有篇blog “快樂方程式”．我媽咪天生樂觀．我本身係個悲觀0既人(或者你睇唔出).媽咪個人實在非常硬正同樂天.佢同我講,起碼我家陣斷骨可以好得返.我都一直在學,學媽咪樂天堅強.
Wendy晚上黎探我,講開2009有次我地去船河.同船有位媽媽玩完香蕉船,唔舒服.過幾日後,腦出血去咗.睇到個blog有位媽媽懷胎39周,BB一出世就做幾次手術,結果都係救唔返.我一直以來都好好彩吧.諗返起以前不自量力地游水,楂電單車,係澳洲有次朋友楂車落山失控,澳洲個次撞車….就算係今次都尚算好彩,可以好得返嘛.
我宜家0既心情比之前好好多.過咗denial phase.啱啱返屋企個段時間,有點抑鬱吧.就算我唔眼瞓,我都係留係張床度,無心機,乜都唔想做.朋友,屋企人比0的正能量我.時間令我習慣呢段”頹”0既生活.我得承應我真係一個懶鬼.有朋友建議我温下ielts(我諗唔考lu).Wendy叫我趁呢段時間向媽咪學煮餸(這個….諗諗)我都係鍾意係病房度忙
下次覆診1/2/2010
今次可以借休息時間體驗其他野,學下其他野嘛!!
看看書吧!!有個FRIEND借了本書我看,男人昰火星.女人是水星!!!(like that,I am not sure the name!!)一定有所得着!!!
不如你做下d 平時忙做唔到既野囉.. 不過你煮餸呀.. haha.. 可唔可以唔諗呢個. 你個次係澳洲返唻話都識識地煮野.. 我依家仲記起個塊豬扒.. 其實仲有好多野可以做既.. 得閒幫下我搵d新歌haha 支持你呀.. 好快過啦
2009年12月31日 星期四
回首2009 & more
2008年0既聖誕同元旦,仲記得係澳洲同一班外國朋友過.2007已經忘了怎樣過.2009四月由澳洲返港,準備英文試,希望攞澳洲個護士牌,又肥佬.去咗三次旅行(good,good ,good!).諗揾份長工,定去多個工作假期.結果選了後者(諗住玩多一,兩年,逃避現實吧).一直做散工.怎料年尾,玩小型賽車斷骨.我已取消咗愛爾蘭張機票.慶幸曾經有個澳洲工作假期.宜家好好收拾心情,好返後,好好工作.唔好再令家人朋友擔心.
我本來以為元旦,我可能自己一個係屋企過.日頭我睇返朋友以前給我的聖誕咭,信同紀念冊.跟住又睇返日記同blog,好開心!妹妹同andrew放工後,都留係屋企,我地一齊睇左套幾悶0既電影.爸媽十一點幾到屋企.差不多十二點,聽到外面有人倒數.開電視睇好靚0既煙花,同家人互相講Happy New Year! amanda 係msn約我食早餐.我已經十日無落過街.
0係屋企行短距離,我無用枴杖,行到怪怪地咁.今朝落街,見痛,都係要用返枴杖.睇我0既進度,我估都仲要一段時間先好得返哂.
隱閉咁耐,面色唔係太好睇吧.不過精神唔錯!
養好身體,好快健健康康Enjoy my life!
2010祝大家健健康康開開心心!!!!!
生活永遠有無限的意外, 但經歷過一個特別的工作假期, 總算無憾...尤如我曾經在20年前在歐洲流浪過10個月, 為我的人生改變了不少...在去年的11月及12月, 我也再次到過澳洲進修, 今年的11月及12月會再去一次, 完結一年的課程, 對於我來說, 澳洲是我的第二個家, 感覺無限親切, 也有我的好朋友, 也不錯呢 !
2009年12月27日 星期日
出院一星期
21/12出院,19天係醫院0既日子,太長了吧. 22/12一早用枴杖(兩枝,腋下有兩個圏個隻)落樓下買早餐,頗吃力的.平時我會幫手開門比0的老人家/推住BB車0既媽咪.這次角色轉玩了.幫我開門0既婆婆開我咩事,祝我早日康服.23/12本來做姊妹的,去唔到好友0既婚宴,好唔開心.
一星期過去.覺得自己好似隱閉青年咁.情緒低落.手停口停,好好地撞斷自己0的骨……有時我會諗如果我玩小型賽車,無撞度.我宜家繼續日日返工(好想返工啊!),可以同朋友出街,呢個聖誕同新年係屋企度過.我咩都唔想做,係屋企不外乎上下網,狂煲電視,同瞓.
早前朋友send 陳利鋒係澳洲工作假期意外0既事. 講慘,大把人慘過我.人間有情,利鋒得到好多人支持.我亦好幸福,家人同朋友都好支持我.媽咪病咗好耐,仲要照顧我.我3/12炒車,醫生話骨要4-6星期好.媽媽話擔心我去愛爾蘭,但會尊重我決定.之前我會想繼續愛爾蘭0既工作假期.不過宜家tend to 唔去.無mood,唔想媽咪擔心.我覺得可惜的,做唔到計劃0既事 e.g出席舅父,朋友0既婚禮,返工儲$....
anyway我宜家繼續耐心0的,等好番!
感激各位比我0既祝福,山長水遠黎探我,怕我悶,陪我傾....!!!!!!
我傻,但傻得幸福!
或者我唔會再好似以前咁傻,家陣我識驚啦!
呌多D啦, 陪吓媽咪, 咁你即係唔去愛爾蘭拿 ???
睇黎你都係時間定下來啦.......
2009年12月9日 星期三
@骨科病房
7/12 由於女病房太多病人,我被轉去男病房0既雙人房,我隔離床0既Suzan都係護士.由於間房本身設計供單人用.只有一個叫人鐘,插蘇位亦係我個邊.所以我會幫佢按叫人鐘同差電.我地就靠張bedside table互相傳送物資,例如:雜誌.由於我地中間係無簾,大家幾時大小異便都好清楚.佢拔尿喉個日都請教我點樣坐個便盆.佢做咗脊柱手術,用便盆0既難度比我高好多.佢之前怕搞唔掂的話,就用尿片.結果成功.
我之前係女房瞓張電床,比宜家張手搞床舒服好多.呢度雖然無電視,但以前係澳洲有段時間仲悶,所以宜家都唔會覺得太悶.
8/12 今日學用輪椅,後波轉彎,無問題.晚上suzan家人探佢.佢媽咪同我媽咪同是天涯淪落人,非常好傾.兩個廿四孝媽媽.雖然炒車,但亦算不幸中之大幸,起碼我唔使做手術,手腳活動都自如.由於休息夠,仲精神過平時.不過自己真係好衰,搞到屋企人同朋友擔心…...呢兩星期最多落輪椅,第三個星期可以開始行.希望可以快0的好返!
拿住個三角架起身,
9/12
尋日已susan做咗個龜殼(用黎支撐條腰).今日係物理治療師陪同下,用架同士的行路.見到佢好得咁快.3/12做咗7小時0既手術,今日可以落地行.替佢高興之餘,亦羡慕.自己好心急,不過又急唔黎.只有等.今日大巡Grand round(即係一大班醫生,一齊巡房兼教書).顧問醫生,拿住我張x 光片問學生書.之後問我幾句,然後就話我可以用架行.我估無醫生寫低,所以物理治療部下午都係比輪椅我練.病房門口較窄,自己用輪椅出入,頗有難度.
晚上媽媽繼續帶來晚飯同魚肚糖水.佢話擔心我一月去愛爾蘭,我就同佢講睇下到時情況點.細佬帶咗0的我要0既文件,又幫我去電話公司整野.見媽咪有幾聲咳,個樣又好累,病病地咁.個一刻我想喊,真的好內疚.不過我都忍到.我亦知道,自己總會有情緒低落0既時間.人生有好多好多考驗,我要學識去面對,去處理.
10/12
今日我開始用架行,Susan 0既進度亦好好,大家都可以自己行去厠所.Susan 明天可以出院.
醫院0既膳食對我黎講唔差(我食得比較清淡).呢個粟米白汁蒸魚柳賣相不錯吧
病房經理同院牧都黎問候我地
呢幾日都係度煩緊繼續住公立醫院定轉去私家醫院,同埋保險0既問題
2009年12月3日 星期四
護士變病人
玩完賽車,我忍住痛蟻行返屋企.我睇唔到腳有咩瘀傷,行到咁耐.我估我拉襯筯或肌肉吧.
晚飯後媽陪我搭的士去急証室.因姆指同胸口擦傷,先黎枝破傷風針.等候期間,媽媽提起已過身0既公公.媽媽話自己記性越來越差,我同細妹都留意到.佢怕自己好似公公咁會老人痴呆.我答:咁都無辦法.我會照顧你(不過呢期要你照顧我先).腳痛越來越厲害,醫生檢查個陣,忍唔住流眼淚.我未試過痛到咁.照完X光.健康服務助理見我行到樣衰衰,推咗架輪椅比我.見醫生,睇到張片,pubic rami骨折
我都幾好彩,瞓窗口位,近電視,仲係電床黎添.起碼坐高,唔使要人幫.我個格有五個婆婆,一位中年女士.第一次用便盤,剩係攝個便盤落pat pat,我隻右腳抽哂筋.為免整濕張床,小便時唔可以太有勁.我瞓係度去咗一段時間,盡量去清佢.攞返個便盤出黎,果然好重手.成功地無整濕張床,yes!繼續bedrest.
晚上算靜,隔離床婆婆偶爾幾聲咳.routine:半夜打針,探熱,量血壓等.一天早上開水洗面,不過無我份.因為無預入院,牙刷面巾百無.七點幾,兩位工友推我去再照多兩張片.早餐雞粥,甜餐包不賴.巡房,醫生話我要兩星期物理治療,用輪椅.第三個星期可以開始行.可以轉去非急証醫院.媽媽帶來日用品,書,netbook,解解悶.跟住我要辦大事.瞓咗晚,好似無咁痛,我坐咗一段時間,個便盤有0的0梗,不過無便秘就好了.
打電話請病假,比保險經紀,比朋友取消約會....家陣笑,胸口同大肶都會痛.媽媽帶生果,炒米粉同魚肚蓮子糖水(對骨埋口有幫助).係醫院無落地,係咁食同瞓,呢趟可以增到肥吧.
起碼兩星期時間無工返,無得周圍去,可能神要我好好休息吧.同埋玩還玩,真係要注意安全,保重身體!
2009年12月2日 星期三
第三界玩樂王盃
破紀錄由4/11-2/12,一直返工,差唔多整整一個月.今日可以玩返日.久違0既小型賽車.亦係第一次搭港鐵到落馬洲,過關0既人比羅湖少得多.再係深圳搭火車到香蜜湖,除咗機動遊戲,仲見到好多食肆.預料之內,
第二塲排位塲,揀到架好車,
第三塲初賽,亦係第四塲0既排位賽.一開波無耐.頭位車手可能架車有問題,係彎位抄咗.我扭唔切呔,直撞埋車呔堆.撞力好猛.我初時心口同肶位都痛,但我換咗架車,完成賽事
是次分男女子賽,睇男子組比賽,好睇之餘.大家又可以輪樓抖下.玩完第一,二塲,我地食午飯個陣,仲手震緊.加上賽車要好專注.有休息時間,真好!
有兩位朋友都幾年無見,朋友聚舊,開開心心玩返日Good!
ooo, 你都有玩開kart仔架??我地都有攪比賽架wor..有機會 join 埋一齊玩啦..
訂閱：
意見 (Atom)