一個人去旅行

 每次放大假，我都會同朋友出外旅遊．自己一個人去旅行，我從來未試過．去澳洲工作旅行，決定得好快．準備0既時間唔多．有時我會驚，怕自己應付唔黎．我知道好多人會擔心我．我份人粗心大意，無乜記性，論論盡盡．唔見野，我都習而為常．去旅行唔見車飛，手信等，出門口唔記得瑣門．．．無乜方向感，係路盲，無乜安全意識，傻下傻下．經常肚瀉，傷風感冒．餸又唔識煮，無乜planning咁．．．

交咗辭職信，總護士長，同我傾兩句．佢覺得我好傻，一個人去旅行唔悶咩？有時我都質疑自己．點解要自己一個女仔去澳洲？有份穩定0既工，有班好同事，0係香港有屋企人錫，大班朋友陪我玩．搞到媽咪又擔心......雖然你地會覺得我好勇，但我都有怯0既時候．

呢排都忙著為澳洲之旅準備，買野，搵資料，同朋友聚聚．尋日申請咗個國際車牌．遲0的交定下年0既稅．仲諗緊保險點買好．．．好煩，有壓力，好累．

睇咗好多網頁，旅遊人生0既 Forum提供好多有用0既資料．當中有唔同人澳洲工作假期0既故事．其中推介兩本書：”浪蕩澳洲３６５天”，”小女鞋，大背囊”．

我就買咗本lonely Planet，去到澳洲 plan trip用．

澳洲working holliday每年有成一千個名額．咁多人都去過，佢地得，我諗我都得       0既．希望唔會好似亞媽講：”搞唔掂，咪買機票提早返香港．”有0的人去度，好適應澳洲0既生活，有人得個"做"字，有人為搵工，為生活而徬徨.....我又將會有一個點0既故事呢？點解要一個人去旅行？未做過，永遠唔知結果．唔想第時後悔，我選擇去試！